KKG KEMPER KERNE: kevelerez pemdeziek an embregerezhioù

Kambr Kenwerzh ha Greanterezh

KKG KEMPER KERNE, diazezadur foran meret dindan aotrouniezh ar pennoù-embregerezh dilennet gant o c'hetpared, a vez dileuriet ha difennet lazioù 9.800 embregerezh ganti. 350 goprad a vez implijet ganti.

A bouez eo hec'h obererezh armerzhel evit a sell ouzh Kerne hag an departamant. Emellout a ra e kement diviz o tennañ d'ar vuhez armerzhel ha da derkañ an tiriad. Dre he doare-merañ, hec'h araezioù hag he barregezhioù teknikel eo a bouez-tre he roll a-fet ambroug hag aliañ an embregezhioù. Diorroet a galz he deus ar c'hinnig stummañ ivez hag e vez nevesaet dibaouez war dachenn an deskardelezh hag ar stummerezh pad.

Merañ a ra KKG KEMPER KERNE, aozadur dibar eus Penn-ar-Bed, aveadurioù frammus bras bet krouet diwar hec'h intrudu peurliesañ. E-touez an aveadurioù-se e c'haller menegiñ un aerborzh, seizh porzh-pesketa, seizh koc'hu-pesked (3 anezho zo e-touez 5 koc'hu-pesked brasañ Frañs ken e sell ouzh ar c'hementad ken e sell ouzh an dalvoudegezh).

Roll an dilennidi eo seveniñ politikerezh hollek ar c'hKKG dre hanterouriezh ar Bodadoù (studi ha melestradur) hag ar Strolladoù Labour. Parlamant an Embregerezhioù zo ennañ izili ditlet (32), izili gevelet (32), kuzulierien deknikel (49), dileuridi goñsulel (191). Gant ar re-se, harpet gant Renerezhioù ar rannoù oberatael hag arc'hwelek, e vez savet teuliadoù hag a vez kinniget da c'houde da vezañ burutellet gant izili ar Burev a-raok diskouez anezho da-geñver an Emvod Meur. Evit an domanioù emellout a sell outo ez evezh ar Bodadoù ouzh sevenidigezh an oberoù kaset da benn gant ar Strolladoù Labour ha Renerezhioù disheñvel ar c'hKKG. Rentañ kont a ra ar Bodadoù eus o labourioù da izili ar Burev ha d'an Emvod Meur.

Ouzhpenn-se e kemer perzh an dileuridi goñsulel e dilennadeg barnerien Lez-varn ar C'henwerzh.

Termeniñ a ra ar Brezidantelezh hag an dilennidi strategiezh ar C'hKKG. Bodañ ha gwellekaat a ra ar Pennrenerezh hollad ar c'hoskor, an araezioù teknikel hag arc'hantel a-benn lakaat ar strategiezh-se e pleustr.

Melestriñ ha merañ a ra Renerezh ar C'hoskor 380 goprad an Embregerezh KKG, kemer a ra stummerezh pad e c'hopridi e karg ha reiñ a ra lusk d'an emziviz sokial. Reiñ a ra harp d'an Embregerezh KKG war an tachennoù gwirel, kretadurioù ha kevratoù.

Renerezh ar C'hehentiñ, mouezh-aotreet ar C'hKKG, zo kendivizer brientek ar mediaoù. Startaat a ra al liammoù skoulmet gant kevelerien armerzhel ar bastell-vro ha brudañ a ra an Embregerezh KKG ouzh e arvalien-perzhour.